Sherqiy Türkistan Sürgündiki Hökümitining Barin Inqilawining 21 Yilliqini Xatirlesh Heqqidiki Bayanati

 

 

Igilmes- sunmas, zulumgha bash egmeydighan, düshmenge hich waqit teslim bolmaydighan Sherqiy Türkistan xelqi buningdin 21  yil awal yeni 1990-yili 5-Apirilda qozghulup, Xitay ishghaliyitige qarshi quralliq qozghilang teshkillep, Sherqiy Türkistan xelqining milliy iradisini dunyagha jakarlap, milliy herkitimizning üzlüksizlikini dunya jamaetchilikige yene bir qétim namayan qilghanidi.

Xitay tajawuzchilliri u qétimqi herketni wehshiylik bilen basturghan bolsimu, Barin inqilawining qarangghuluq we zulmet  qaplap turghan Sherqiy Türkistan tupraqlirigha chachqan ot uchqunliri xelqimizning qelbini yorutup, ejdatlirimizning simasini nurlandurmaqta we milliy herkitimizge hayatiy küch bexish etmekte!Bu alemshunul weqe Insaniyetning jümlidin millitimizning zulum we qulluqqa qarshi élip barghan inqilawiy küreshliri qatarida tarix betlirige altun hel bilen qeyit qilinghusi!

Bügün dunyani zil-zilige keltürgen Sherqiy Türkistan Barin inqilawining 21. yili. Eger 21 yil ilgirki qozghilang ghelbe qilip, musteqil Sherqiy Türkistan Jumhuriyiti qaytidin qurulghan bolsa idi, eyni waqitta Qanxor xitay eskerliri teripidin böshükide turghuzulup oq yamghurigha tutulghan buwaqlar söygen ashiq meshuqliri bilen mushu künlerde teswirligüsiz xushal-xuramliq ichide jumhuriyet bayrimini qutlighan bolatti.Xelqimiz Barin inqilawini xatirlewatqan mushu künlerde, Xitay tajawuzchilliri tarixtin sawaq élip, Sherqiy Türkistanni Uyghurlargha  tinch qayturup bérip, dunyawiy éqimgha egishish uyaqta tursun, eksiche wetinimizde téximu wehshiylik bilen érqiy, kultural we diniy qirghinchiliq élip bérip millitimizni, milliy herkitimizni  her-türlük usullar bilen yoq qiliwétishtin ibaret zeherlik pilanini yürgüziwatidu.

Xitay tajawuzchilliri buningdin 21 yil awal, namrat we qalaq halette qaldurulghan mezlum xelqimizni, muntizim we zamaniwiy armiyesini ishqa sélip essebiylerche basturup, zulumgha bash egmeydighan munnewer  qiz-yigitlirimizni éghir siyasiy jazalar bilen qirip tashlap, minglighan aililerni weyran qildi, on-minglighan sebiylerni yétim qaldurdi.Xelqimiz shu qétimqi qanliq qisasni héch unutmaydu.Shundaq bir künler kéliduki, tajawuzchilarning  Sherqiy Türkistan tupraqlirida ishligen jinayetlerdin ayrim-ayrim hésap élinip, qolliri xelqimizning issiq qénida boyalghan qatillar, milliy herkitimizge soqunup kirip, birlik we ittipaqliqimizgha buzghunchiliq qilghan milliy munapiqlar haman  adalet aldida sotqa tartilidu.

Biz Sherqiy Türkistan Sürgündiki Hökümiti bolush süpitimiz bilen, shuni jakarlaymizki, milly herkitimizning tizgini Barin qehrimanlirining yürek sadasi bolghan xelqimizning musteqilliq arzusidin ibaret milliy iradisi teripidin konturul qilinmay ishlengen xizmetler san jehettin köpeygendek körünsimu, özimizning milliy iradisige özimiz xoja bolghan shekilde ishligen eng kichik xizmetler bilenmu tenglishelmeydu. Milliy dawayimiz üchün  bashqilarning qonchiqigha aylinip mangghan yüz qedem, öz aldimizgha qarar chiqirip tashlighan bir qedemchilik xelqimizning ussighan yérige barmaydu.

Biz Sherqiy Türkistanliqlar milliy herkitimizdiki asasiy we uzaq muddetlik éqimlar bilen yandash we ötkünchi  éqimlar ottursidiki munasiwetni toghra mölcherliyelmisek, dost bilen düshmenni  waqtida éniq periq itelmisek, qoshunimizni yéngidin tertipke salmisaq küchimiz, Milliy herkitimizning yol xeritisini bashqidin lahiylep chiqmay bundaq kétiwersek waqtimiz, eqlimiz we maddiyitimiz  zaya bolidu, düshmenning oylighan yéridin chiqqan bolimiz, pursetler qoldin kétidu, éghir pishmangha qalimiz.Xitaylar tarixtin béri weten ichi we siritida yandash we ötkünchi éqimlargha adem toplap, ularning qoli arqiliq, asasiy we uzaq muddetlik éqimdiki qoshunimizni yétim qaldurup, milliy dawayimizni uzaqtin konturul qilip, hichqanche bedel tölimeyla eziz wetinimiz Sherqiy Türkistanni mustemlikiside tutup turiwatidu.Buni azraqla bash qaturghan kishi asanla hés qilalaydu.Xitayning undaq qilishidiki meqset waqit jehette utup chiqish, milliy herkitimizni tuyuq yolda ajizlashturup yoq qilish.

 Azatliq we musteqilliq ölümdin qorqmaydighan, öz wetinini we millitini jénidin eziz köridighan, ghurur we wijdanini ippitidek qoghdiyalaydighan xeliqlerge asanla nésip bolidighan taley bolghachqa, uninggha muyesser bolush üchün, milliy Jumhuriyetchilik rohiy, jümlidin Barin qehrimanlirining siyasiy iradisige warisliq qilip, küchimizni, zihnimizni, eqil-parasitimizni we jasaritimizni  téximu urghutup, birlik, ittipaqliq we teqdirdashliq tuyghusi bilen kürishimizni üzliksiz dawamlashturushimiz, saadet we erkinlikimiz üchün pidakarliq bilen izdinishimiz, toghra pikir we toghra nishan tiklishimiz, toghra Edioligiyening etrapigha zich uyushushimiz, tuyuq we ayighi chiqmaydighan kochilarda temtirap yürüshtin waz kéchip, oxshash éghizda, oxshash awaz chiqirip, milliy dawayimizni milliy iradimizni heqiqiy ekis ettüridighan axirqi nishangha burishimiz, ejdatlardin miras qalghan „Axirqi ghaye musteqilliq“tin ibaret eshu muqeddes bayraq etrapigha ochuq-ashkare toplinishimiz lazim!

Sherqiy Türkistan Sürgündiki Hökümiti Sherqiy Türkistan Barin Inqilawining partilighanliqini tebriklesh munasiweti bilen Sherqiy Türkistanning milliy musteqilliqi üchün qurban bolghan qehrimanlargha Alladin yoquri mertiwe we aliy ihtiram, turmida yétiwatqanlargha we aile tawabatlirigha  sebre-taqet shundaqla  milliy herkitimizdiki japakesh, pidakar ezimetlerge gheyret-shijaet  tilesh bilen birge, ularning qewmi-qérindashliri we sebdashlirigha xatirjemlik, azatliq we musteqqilliq tileydu.Shéhidlerning köngli shad bolsun , Alla xelqimizge  yar bolsun!

 

Sherqiy Türkistan Sürgündiki Hökümiti Kultur we Teshwiqat Ménistirliki

                               05.04.2011   Gérmaniye