Uyghuristandiki Tekfir Éqimi We Uning Xetiri

Ixtiyariy muxbirimiz Ömerjan
2013-09-25
Xitay dairilirining uyghurlargha qaratqan türlük bésimi we diniy étiqad cheklimiliri uyghurlarni chüshkünleshtürmekte.

 

Epsuski, kéyinki waqitlarda otturigha chiqqan «tekfir» yeni kishilerni kapirliqqa chiqiriwétish éqimi uyghur élidiki musulmanlar otturisida eng xeterlik bölünüshlerge seweb bolup kelmekte.

Bu éqim ereb islam memliketliridin tarqilip, uyghur diyarimizdimu belgilik tesir qozghighan. Hetta özining pikir éqimigha mas kelmeydighan pikir éqimidiki musulman jamaetlerni islam eqide prinsip, mizanigha salmay turupla «kapirlar» dep aldirap höküm qiliwétidighan xahishlarmu bash kötürüshke bashlidi. Beziler détigha yaqmighanlarni aldirapla «munapiqlar» dep tashlaydu. Bu islam ümmitining bölünüshige seweb bolghanning sirtida, allah taalaning nezeridimu xata ishtur. Hazirqi künde uyghurlarning arisida tarqalghan «hijret qilmighanlar munapiqlardur» dep diyarimizda öz mewjudiyitimizni saqlap turuwatqan we eng éghir künlerde yashawatqan u eziz milletni ailiwi weyranchiliqqa, ömürlük musapirchiliqqa we chidighusiz péqirchiliqqa dewet qilidighan, «maash alghanlar musulman emes» dep musulmanlarni idare-Jemiyet, zawut-Fabrika we kan-Karxanilardin boshitip, orunni «aka millet» ke hazirlap béridighan, «saqal qoymighanlar musulman emes» dep musulmanni kapirgha chiqiriwétidighan ghelite éqimlarning hemmisi ene shu tekfir éqimi bilen munasiwetlik bolup, bular özlirining détigha yaqmighanlarning hemmisini asanla «kapir» qiliwétidu.

Tekfir éqimining otturigha chiqishigha türtke bolghan amillar

Islam dunyasining meshhur ölimasi doktor yüsüp el qerdawi özining «hazirqi zaman petiwaliri» namliq esiride mundaq dep yazghan:«tekfir éqimi islam elliridiki dinigha muxlis, jemiyetni islah qilishni közleydighan, yaxshi niyetlik, biraq sheriet ilimliridin bolghan desmayisi we nésiwisi intayin az, hayajanning arqisidin chapidighan, pikir dairisi intayin tar bir qisim diniy qérindashlar teripidin otturigha chiqqan bolup, bu, her türlük xataliqlarning we islam namidin xata petiwalarning otturigha chiqishigha seweb bolup keldi.

Chünki, kishilerni islah qilish we jemiyetni tüzüsh üchün yalghuz ixlasla kupa qilmaydu. Xawarijlarmu eng ixlasmen, yaxshi niyetlik ademler bolsimu, sheriet ilimliridin yéterlik derijide nésiwe alalmighanliqtin «chong gunah sadir qilghanlar kapir bolidu» dégen pikirde ching turuwalghan, hetta katta sahabilernimu «kapir» dep höküm qiliwetkenliki seweblik yoldin azghan we azghun pirqilar qatarigha ötüp ketkenidi. Ilim ibadettin muhim bolghanliqi üchün sahabilerdin bashlap barliq islam ölimaliri musulmanlarni ibadet we jihad qilishtin awwal ilim öginishke chaqirip keldi. Qedimki ölimalardin hesen el besriy mundaq dégen iken: «bilimsiz ish qilghuchi xuddi qingghir yollarda adashqan ademge oxshashtur. Ibadet bilen ilim öginishni bir-Birige qarshi qilmighan halda ilim ögininglar. Bezi qewmler ibadet bilenla bolup, ilim öginishni terk etkenliki seweblik özining diniy qérindashliri bolghan islam ümmitige tigh tenglidi. Eger ularning ilimdin nésiwisi bolsa idi, bundaq qilmighan bolatti.» Démek, musulmanni kapirliqqa chiqiriwétish bölünüshtin bashqisigha yarimaydu. Shunga musulmanlar qatarida özini men musulman dep yürgen ademni kapir déyish toghra emes.»

Chong gunahlar imanni ajizlashturidu, emma imandin chiqarmaydu

Doktor yüsüp el qerdawi mezkur esiride yene mundaq dep yazghan: «chong gunahlarni ishligen adem tewbe qilmastin shu gunahlarni dawam qiliwéridiken, uning imani ajizlishidu, lékin imani asasidin yoqilip ketmeydu. Buning delili mundaq:
1. Quran kerim qatilning öltürülgüchisining igiliri üchün diniy qérindash ikenlikini sözligen».I iman éytqanlar! öltürülgenler üchün qisas élish silerge perz qilindi, hür adem üchün hür ademdin, qul üchün quldin, ayal üchün ayaldin(qisas élinidu). Qatil üchün diniy qérindishi(öltürülgüchining igiliri) teripidin bir nerse kechürüm qilinsa, (ularning qatildin diyetni) chirayliqche telep qilishi we (qatilningmu diyetni) yaxshiliqche bérishi lazim.»
2. Quran kerim bir-Birige tigh tengleshken ikki pirqe kishilirinimu «möminler» we «öz-Ara qérindashlar» dep atighan. «Eger möminlerdin ikki guruh urushup qalsa, ularning arisini tüzep qoyunglar, eger ularning biri ikkinchisige tajawuz qilsa, tajawuz qilghuchi taki allaning hökümige qaytqangha qeder uning bilen urushunglar, eger ular qaytsa, ularning arisini adilliq bilen tüzep qoyunglar, adaletlik bolunglar, allah heqiqeten adaletlik bolghuchilarni dost tutidu. Möminler heqiqeten qérindashlardur, (urushup qalsa) qérindashliringlarning arisini tüzenglar, rehmetke érishishinglar üchün, allahtin qorqunglar.»

Allahqa shérik keltürüshtin bashqa gunahlar kechürüm qilinidu

Shériktin bashqa pütün gunahlar meyli chong bolsun, meyli kichik gunahlardin bolsun, allah taalaning pezli-Keremi bilen tewbe bilen yaki tewbisiz kechürüm qilinidu.

Quran kerimide: «allah özige birer nersining shérik keltürülüshini elwette meghpiret qilmaydu, buningdin bashqini (allah özi) xalighan ademge meghpiret qilidu, kimki allahqa shérik keltüridiken, u heqiqeten qattiq azghan bolidu» dep kelgen. Bu höküm shériktin tewbe qilmay ölgenler üchündur. Emma tewbe qilip shériktin qol üzgen we imanini yéngilighan adem buningdin mustesnadur. Démek, allah taalagha shérik keltürgendin kéyin tewbe qilghan ademning gunahi kechürüm qilinidu. Ayettiki shériktin meqset: allahtin bashqa birini ilah qilip choqunush yaki allahqa étiqad qilish bilen birge bashqisini ilah tutushtur.»

 

Advertisements

About The Eastturkestan Government in Exile
The Official Website of Eastturkestan Government in Exile

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: