Sénator marko rubiyo “Fokus” xewerler qanilida Uyghurlarning weziyitini tonushturdi

2018-08-24
Sénator marko rubiyo "Fokus" xewerler qanilida Uyghurlarning weziyitini tonushturmaqta. 2018-Yili, 23-awghust. Amérika.

Sénator marko rubiyo “Fokus” xewerler qanilida Uyghurlarning weziyitini tonushturmaqta. 2018-Yili, 23-awghust. Amérika.

 foxnews.com

Hörmetlik radi’o anglighuchilar, “Fokus” xewer qanilining tonulghan programma riyasetchisi takkér karlson 23-awghust künidiki axshamliq söhbet programmisida Uyghurlarning weziyitige mexsus orun berdi. U “Xitay tehditi” dep mawzu qoyulghan bu programmisigha amérika kéngesh palata ezasi marko rubiyoni teklip qilip, uningdin Uyghurlar we xitay hökümiti heqqide so’allarni soridi.

Riyasetchi takkér karlson programmisining kirish qismida amérikida bir qisim kishiler özining diktatoriliqqa qarshi ikenlikini ilgiri sürsimu, emma xitaygha oxshash heqiqiy bir diktatorgha kelgende jimip qalidighanliqini, kishilik hoquq xatirisi intayin nachar bolghan xitay hökümitining hazir özining gherbiy qismidiki shinjang Uyghur aptonom rayonida bir milyondin oshuq musulmanni yéghiwélish lagérlirigha solash bilen birge yene rayon’gha zor kölemde xitay köchmenlirini yötkesh arqiliq ularning medeniyitini yoq qilishqa urunuwatqanliqini bayan qilip ötti. Andin u kéngesh palata ezasi marko rubiyoning bu mesilige köngül bölüwatqan sanaqliq sénatorlarning biri ikenlikini éytip, uni sözge teklip qildi. Takkér karlson marko rubiyodin: “Bir milyondin ibaret bundaq zor sandiki ademning lagérda yétiwatqanliqi rastmu, bu rast bolsa némishqa bu heqte köplep eks sada yoq” dep soridi.

Sénator rubiyo buninggha jawab bérip: “Bu rast. Gugulning yershari épide bu lagérlar nahayiti éniq körünidu. Emma biz xewerlerge qaraydighan bolsaq, özining épide bu lagérlar éniq körünidighan gugul shirkiti hazir xitay bazirigha qaytip kirish üchün xitay bilen hemkarlishiwatidu. Xitay hökümiti ‘qayta terbiye merkizi’ dep atalghan bu orunlarda kishilerni öz ismini özgertish qatarliq her türlük ishlargha mejburlawatidu. Bu yerde diqqet tartishqa tégishlik bir nuqta shuki, Uyghurlar ashqun kishiler emes,” deydu.

Sénator marko rubiyo sözi dawamida yene xitaygha téxnikilirini sétip bériwatqan amérika téxnika shirketliri bilen birlikte yene islam dunyasini tenqid qilidu: “Bu yerde ademni ghezeplendüridighan bir qanche mesile bar. Birinchidin, amérikining we yawropaning bir qisim shirketliri özining nazaret téxnikilirini xitaygha sétip bérip, ashu insanlarning qéyin ehwalgha qélishigha yol échip bériwatidu. Mesilen, xitay hökümiti amérikining d n a téxnikisini ishlitip turup, u insanlarning d n a uchurini mejburiy yighiwatidu. Bu éhtimalliq intayin yuqiri. Ikkinchidin, dunyadiki ereb döletliri, musulman döletlirige qarap baqayli. Adette bashqa bir ish bolsa otturigha sekrep chüshidighan ottura sherqtiki musulman döletler bu mesilige kelgende pütünley süküt ichide turuwatidu. Elwette buning jawabi pul. Xitayning puli pütün dunyani aylinip, hökümetlerge para bérish arqiliq ularni bu mesilide éghiz achalmaydighan qilip qoydi. Xitay bu döletlerni özlirining qebih we wehshiy siyasetlirini körüp turupmu gep qilmay sükütte turushi üchün para berdi. Eslide bular del shi jinping hakimiyitining heqiqiy yüzini körsitip béridighan siyasetler idi.”

Riyasetchi takkér karlson marko rubiyoning jawabidin heyran qélip, “Bu heqiqetenmu heyran qalarliq ishken. Se’udi erebistan we misir hökümetliri dunyadiki chong musulman hakimiyetlerdur. Ular xitaygha musulmanlargha qiliwatqan zulumini toxtitish heqqide bir bésim ishletmidimu?” dep soridi.

Marko rubiyo buninggha jawab bérip: “Shundaq, ular tilgha élipmu baqmidi. Xelq’araliq organlardimu shundaq. Axiri ötken hepte bir xelq’araliq organ bu mesilide xitay hökümitini jawab bérishke qistidi. Emma islam döletlerning özi chiqip birnerse dep baqmidi. Dégenliri bolghan teqdirdimu ular nahayiti yumshaq sözler. Eger bir gherb döliti herqandaq bir din’gha tewe bolghan bir milyon kishini ashundaq soliwalghan bolsidi, u halda biz nahayiti zor chuqanlarni anglighan bolattuq. Emma Uyghurlar mesilisige kelgende bu döletlerning hökümetliri köpinchisi xitay hökümitidin para alghan yaki xitay hökümitining meblegh sélish heqqidiki wedilirini alghan bolghachqa közini yumuwaldi. Menche, bu kishining ghezipini qozghaydighan we qobul qilghili bolmaydighan bir yasalmiliq. Hazir tramp hökümiti bu mesilige diqqet qilip, bir ish qilishqa tirishiwatidu. Men buningdin intayin xursen boluwatimen,” dédi.

Sénator marko rubiyo söhbet programmidiki sözide yene amérikiliqlarningmu xitay heqqidiki tonushining yéterlik emeslikinimu eskertip ötti we “Nurghun amérikiliqlar 1991-yilidin béri heqiqetni chüshenmey kelgen idi. Ular téxi emdi oyghiniwatidu. Xitay bizning heqiqiy menidiki riqabetchimiz emes, ular durus niyet bilen heqiqiy riqabetlishishni emes, belki türlük oyunlar bilen bizning ornimizni igileshning koyida boluwatidu,” dédi.

Marko rubiyo sözini dawam qilip “Epsuski, bir qisim amérika shirketliri xitay bilen tijaret qilishqa shunchilik hewes qilidu. Ular amérika mudapi’e ministirliqi we besh burjeklik bina bilen mudapi’e pilanlirida hemkarlishishni xalimaydu-yu, emma xitayning armiyisi üchün xizmet qilidighan uniwérsitétliri bilen hemkarlishidu. Men prézidént tramp bilen heptide az dégende bir qétim téléfonda körüshüp, uni righbetlendürüp turuwatimen. Chünki bu hökümet uzun yillar boyiche dawam qilghan süy’istémaldin kéyin axiri xitaygha qarshi ornidin des turghan birdin-bir hökümettur,” dédi. Marko rubiyo söhbet programmisining axirida programma riyasetchisi takkér karlsonning bu mesilige orun bergenlikige xursenlikini ipadilep sözini ayaghlashturdi.

Hörmetlik radi’o anglighuchilar, yéqindin buyan Uyghurlar mesilisi amérikidiki mana mushundaq nurghunlighan muhim xewer we söhbet programmilirida orun élip, amérika jama’itining Uyghur mesilisige bolghan chüshenchisini we éngini ashurushta muhim rol oynimaqta. Takkér karlsonning axshamliq programmisimu her küni kech sa’et 8′ de fokus qanilida tarqitilidighan we nurghun kishiler, bolupmu amérikidiki ong qanat siyasetni yaqilaydighan kishiler köplep köridighan programmilardin biri. irade

About The Eastturkestan Government in Exile
The Official Website of Eastturkestan Government in Exile

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: